Украина: Агрегатите во Лавов единствениот извор на светлина

ЛАВОВ (АА) - Жителите на украинскиот град Лавов останаа во темница, а Русија продолжува со ракетните напади врз електричната мрежа во Украина, јавува Агенција Анадолија (АА).

Во текот на ноќта центарот на Лавов е во темница, уличните светла и семафорите не работат. Малите бизниси во овој украински град користат агрегати, додека цените на храната и енергијата вртоглаво растат поради војната во земјата.

Мобилните комуникации и интернет-конекциите не функционираат, а зимата со ниските температури претставува дополнителен проблем за граѓаните бидејќи немаат греење.

Прекините во снабдувањето со електрична енергија се предизвикани од војната, а третина од електраните во земјата беа уништени во руските напади.

Енергетската инфраструктура на Украина е цел на руски воздушни напади од почетокот на војната во февруари.