Шефицата на европската дипломатија: САД остануваат најголемиот сојузник на Европа

ИСТАНБУЛ (АА) - Шефицата за надворешна политика на Европската Унија (ЕУ), Каја Калас, денес рече дека Соединетите Американски Држави (САД) сè уште се „најголемиот сојузник“ на Европа, обидувајќи се да ги намали тензиите откако Вашингтон ја објави својата Национална безбедносна стратегија, обвинувајќи ја Европа за прекумерна регулација, цензура и слабост во однос на миграциските предизвици, јавува Анадолу.

Говорејќи на Доха Форумот во Катар, Калас призна дека делови од американскиот документ се критични кон европските институции, но инсистираше дека трансатлантското партнерство останува недопрено.

„Секако, има многу критики, но мислам дека некои од нив се исто така точни“, рече таа.

„САД сè уште се наш најголем сојузник... Не секогаш сме се согласувале за различни теми, но општиот принцип е сè уште присутен. Ние сме најголемите сојузници и треба да се држиме заедно.“

Новата стратегија, претставена вчераутро во Вашингтон, означува значително отстапување од претходната политика на САД, кодифицирајќи ги критиките на претседателот Доналд Трамп кон Европа што траеја со месеци.

Во документот се обвинува европскиот континент дека е премногу регулиран, дека страда од опаѓање на „самодовербата“ и дека доживува „цивилизациско бришење“ поради имиграцијата.

Тврди дека европските институции „ја поткопуваат политичката слобода и суверенитет“ и предвидува дека доколку продолжат сегашните трендови, Европа ќе биде „непрепознатлива за 20 години или помалку“.

Понатаму се критикува она што го опишува како цензура, потиснување на политичката опозиција, пад на стапките на наталитет и ерозија на националните идентитети. Текстот, исто така, вели дека европските влади не успеваат да ја преточат јавната поддршка за мир во политика поради внатрешни политички ограничувања.

Стратегијата следи по низа остри забелешки од високи американски претставниции, меѓу кои и американскиот потпретседател Џ.Д. Венс, кој во говорот во Минхен ги критикуваше ограничувањата на слободата на говорот во Европа и се осврна на крајно десничарските движења како што е германската АфД.

Документот не именува конкретни политички партии, но ја одразува долгогодишната поддршка на Трамп за лидери како што е унгарскиот премиер Виктор Орбан, познат по неговото противење на имиграцијата и ЛГБТК правата.

И покрај ескалирачката реторика, Калас нагласи дека соработката со Вашингтон останува од суштинско значење.