Јапонската организација на преживеаните од атомските бомби ја обнови заложбата за свет без нуклеарно оружје

„Нихон Хиданкјо“, водечка јапонска организација на преживеаните од атомските бомбардирања, денес ја обнови својата заложба за постигнување свет без нуклеарно оружје, одбележувајќи ја 70-годишнината од основањето, објави „Кјодо њуз“, пренесува Анадолу.

„Секој граѓанин на светот ќе придонесе за изградба на човечко општество без нуклеарно оружје и војни. Ќе продолжиме да повикуваме на тоа сè додека сме живи“, соопшти организацијата.

Организацијата во 2024 година ја доби Нобеловата награда за мир за нејзината повеќедецениска кампања за нуклеарно разоружување и напорите преку сведоштвата на преживеаните да покаже дека нуклеарното оружје никогаш повеќе не смее да биде употребено.

Нејзината работа е насочена кон унапредување на социјалните и економските права на преживеаните од атомските бомбардирања, познати во Јапонија како „хибакуша“, вклучително и на преживеаните што живеат надвор од земјата.

Се проценува дека до крајот на 1945 година околу 214.000 лица починале како последица на американските атомски бомбардирања на Хирошима и Нагасаки.

Бомбардирањата се случија во последните денови од Втората светска војна.