Esra Tekin
09 Септември 2025•Ажурирај: 10 Септември 2025
ИСТАНБУЛ (АА) - Турскиот претседател Реџеп Таип Ердоган го осуди нападот на Израел во главниот град на Катар, Доха, во кој се таргетирани членови на Хамас, нагласувајќи дека тоа го прекршило меѓународното право и суверенитетот на Катар, јавува Анадолу.
„Нападот на Израел врз преговарачката делегација на Хамас во Катар уште еднаш јасно го демонстрираше слепиот бес на владата на (Бенјамин) Нетанјаху и нејзината намера да го продлабочи конфликтот и нестабилноста“, истакна Ердоган преку социјалните мрежи.
Турција стои покрај Палестинците и својот сојузник, пријател и стратешки партнер Катар, со сите свои средства, рече Ердоган, додавајќи дека оние кои го прават тероризмот државна политика никогаш нема да успеат.
„Ќе застанеме цврсто против неодговорните акти на Израел што го влечат регионот во катастрофа и ќе продолжиме да го браниме мирот, меѓународното право и слободата на палестинскиот народ по секоја цена“, рече турскиот претседател.
Денес израелската војска соопшти дека извршила „прецизен напад насочен кон високото раководство“ на палестинската група Хамас.
Катар го осуди нападот нарекувајќи го „кукавички“, велејќи дека таргетирани се станбени згради во кои биле сместени членови на политичкото биро на Хамас.
Заливската држава, заедно со САД и Египет, игра централна улога во напорите за посредување за ставање крај на израелската војна во Газа, во која од октомври 2023 година се убиени над 64.000 Палестинци.
