Liban, një shpërthim trondit ndërtesën e Hezbollahut në pjesën jugore të vendit

Një shpërthim i fuqishëm tronditi një ndërtesë të përdorur nga Hezbollahu në qarkun jugor Nabatieh të Libanit, raporton Anadolu Agency (AA).

Dëshmitarët për AA thanë se ndërtesa, e cila ishte një zyrë e shërbimeve sociale të Hezbollahut për qytetin Houmine el-Faouqa, u dëmtua rëndë nga shpërthimi, së bashku me strukturat përreth.

Mediat lokale shfaqën video që tregonin tym të dendur dhe flakë që dilnin nga ndërtesa.

Zyrtarët e Hezbollahut mbyllën menjëherë zonën dhe shërbimet e shpëtimit shuan zjarrin e shkaktuar nga shpërthimi.

Nga raportimet paraprake dyshohet se nga shpërthimi nuk ka të lënduar. Shkaku i shpërthimit gjithashtu mbetet i paqartë.

Hezbollahu ende nuk ka komentuar mbi incidentin.