Macron pranon se "ka policë që janë të dhunshëm"

Presidenti francez Emmanuel Macron pranoi të premten se ka oficerë të dhunshëm policie, raportuan mediat lokale, transmeton Anadolu Agency (AA).

"Ka policë që janë të dhunshëm" dhe "ata duhet të ndëshkohen", tha Macron gjatë një interviste me video-platformën online Brut, sipas Radio France Internationale, ose RFI.

Macron tha se evakuimi i azilkërkuesve nga Place de la Republique në qendër të kryeqytetit ishte i duhur dhe ata më vonë u dërguan në një strehimore. Por ai pranoi se disa oficerë policie u sollën në mënyrë të pahijshme gjatë evakuimit.

"Nëse nuk jeni të bardhë, ka më shumë të ngjarë të kontrolloheni nga policia. Ju identifikoheni si një faktor problemi dhe kjo nuk mund të justifikohet", u citua të ketë thënë Macron.

Lidhur me kritikat për projektligjin e diskutueshëm të sigurisë, Macron tha: "Unë nuk mund të lejoj të thuhet se ne po kufizojmë liritë në Francë".

“Kjo është një gënjeshtër e madhe. Ne nuk jemi Hungari apo Turqi", tha ai.

I pyetur në lidhje me komentet e presidentit turk Recep Tayyip Erdoğan në të cilin ai tha se Macron ishte "telashe" për kombin francez, udhëheqësi francez tha: "Unë besoj në respekt ... Unë mendoj se fyerjet midis udhëheqësve politikë nuk janë mënyra për të bërë gjërat".

"Franca nuk ka asnjë problem me Islamin", tha ai. "Ne jemi një vend që gjithmonë kemi pasur dialog ... por ne themeluam Republikën tonë mbi ndarjen e fesë nga politika".