Rusia thotë se është përpara vendeve perëndimore në prodhimin e armëve

Zv.kryeministri rus Denis Manturov tha se vendi i tij është përpara vendeve perëndimore për sa i përket prodhimit të armëve, transmeton Anadolu.

"Nuk dua të mburrem, por mund të them se ne filluam të fitojmë dhe kemi rritur ritmin e prodhimit më herët se vendet perëndimore", tha Manturov në një intervistë për agjencinë shtetërore ruse të lajmeve RIA.

Manturov, i cili është edhe ministër i industrisë dhe tregtisë së Rusisë, tha se pyetja është se sa do të zgjasë kjo garë.

Duke vënë në dukje se ata po punojnë në kuadrin e programit të armatimit të shtetit dhe një programi afatgjatë që përfshin periudhën midis 2025 dhe 2034, Manturov tha se ministria e tij dhe Ministria e Mbrojtjes e Rusisë "po punojnë në mënyrë aktive për të verifikuar dhe përgatitur këto parametra".

Manturov tha gjithashtu se prodhimi dhe furnizimi me armë për ushtrinë ruse në vitin 2023 është rritur me 10-12 herë për disa artikuj.

"Për disa artikuj kemi rritur vëllimet e prodhimit dhe ofertës me 10-12 herë. Për shkak të disa nuancave, nuk mund të flas për gamën specifike të furnizimeve dhe financimeve, por më besoni, shifrat janë të mëdha", shtoi ai.