Përfundojnë Lojërat Olimpike "Paris 2024"

Lojërat Olimpike "Paris 2024" përfunduan me ceremoninë e mbylljes në "Stade de France", raporton Anadolu.

Ceremonia e mbylljes, e zhvilluar në "Stade de France" me një kapacitet prej 80 mijë personash në Paris, kryeqytetin e Francës, u ndjek nga presidenti francez, Emmanuel Macron, presidenti i Komitetit Olimpik Ndërkombëtar, Thomas Bach dhe të ftuar.

Ceremonia nisi me notuesin francez Leon Marchand, i cili fitoi 4 medalje ari dhe një bronzi në Lojërat Olimpike "Paris 2024", duke shuar flakën olimpike në kopshtin historik Tuileries dhe më pas u këndua himni francez.

Flamujt e 204 vendeve pjesëmarrëse në Lojërat dhe Ekipit Olimpik të Refugjatëve u sollën në stadium nga atletët.

Gjatë ceremonisë, grupet e sportistëve hynë në stadium të shoqëruar me këngë.

- Sifan Hassan u shfaq në ceremoninë e medaljes e veshur me shami

Ceremonia e fundit e medaljeve në organizim u zhvillua në stadium për 3 sportistet më të mira që u vendosën në maratonën e femrave.

Sifan Hassan nga Holanda me origjinë etiopiane, e cila fitoi medaljen e artë në këtë kategori, u shfaq në ceremoni e veshur me shami.

Franca kishte ndaluar sportistët e saj të merrnin pjesë në ceremoninë e hapjes me shami.

- Flamuri olimpik iu dorëzua SHBA-së

Ceremonia vazhdoi me shfaqje vizive dhe vazhdoi me fjalimet e zyrtarëve.

Kryetarja e Qytetit të Parisit, Anne Hidalgo, ia dorëzoi flamurin olimpik kryetares së Los Angelesit, Karen Bass, e cila do të organizojë Lojërat Olimpike 2028. Karen Bass mori flamurin së bashku me gjimnasten amerikane, Simon Biles.

Simon Biles ia dha flamurin olimpik aktorit amerikan, Tom Cruise, i cili zbriti në skenë me mekanizmin e vendosur në çatinë e stadiumit. Teksa aktori i njohur po largohej nga skena me motor, flamuri i valëvitur në SHBA u pasqyrua në ekranet e stadiumit në kuadër të skenarit të përgatitur.

Publiku në stadium u argëtua nga koncertet e Red Hot Chili Peppers, Billie Eilish dhe Snoop Dogg nga SHBA-ja, të cilat u pasqyruan në ekran.

Ceremonia e mbylljes përfundoi me fishekzjarre.