١٠ ملیۆن گه‌شتیار سه‌ردانی ئا‌نتالیایان كردووه‌

ئا‌نتالیا - AA

به‌پێی زانیارییه‌كانی به‌ڕێوه‌به‌رایه‌تی كولتوور و گه‌شت و گوزاری ئا‌نتالیا له‌ یه‌كی كانوونی دووه‌مه‌وه‌ تا ٣١ی ئابی ٢٠١٩، ٤٣٧ هه‌زار و ٦١٥ گه‌شتیاری ناوخۆیی و ١٠ ملیۆن و ٣٢٨ هه‌زار و ٣٣١ گه‌شتیاری بیانیی سه‌ردانی ئه‌و شاره‌یان كردووه‌.

ژماره‌ی ئه‌و گه‌شتیارانه‌ی له‌ میانی هه‌شت مانگی ئه‌مساڵدا سه‌ردانی ئا‌نتالیایان كردووه، به‌راورد به‌ هه‌مان ماوەی ساڵی رابردوو له‌سه‌دا ١٧ زیادی كردووه‌ و گه‌یشتووه‌ته‌ ١٠ ملیۆن و ٧٦٥ هه‌زار و ٩٤٦ كه‌س.

گه‌شتیارانی رووسیا زۆرترین ئه‌و گشتیارانه‌ن كه‌ روو له‌ ئا‌نتالیا ده‌كه‌ن و له‌ میانی ئه‌و هه‌شت مانگه‌دا، سێ ملیۆن و ٨٦٥ هه‌زار و ٣١٠ لە گه‌شتیارانی رووسیا روویان له‌ شاره‌كه‌ كردووه‌ به‌ مه‌به‌ستی به‌سه‌ربردنی پشووه‌كانیان. دوای ئه‌وانیش گه‌شتیارانی ئه‌ڵمانیا دێن كه‌ یەک ملیۆن و ٦٩٧ هه‌زار و ٨٢٤ كه‌س له‌ ئه‌ڵمانیاوه‌ سه‌ردانی ئه‌و شاره‌یان كردووه‌.

هه‌روه‌ها له‌ ئۆكرایناوه‌ ٥٩٦ هه‌زار و ٦٤٥ و له‌ به‌ریتانیاوه‌ ٥٣٠ هه‌زار و ٤٤٤ و له‌ پۆڵه‌نداوه‌ ٤٠٠ هه‌زار و ٢١٤ گه‌شتیار روویان له‌ ئا‌نتالیا كردووه‌ بۆ به‌سه‌ربردنی پشووه‌كانیان.

له‌م نێوه‌نده‌دا له‌ مانگی ئابی ٢٠١٩دا، دوو ملیۆن و ٥٧٢ هه‌زار و ٢١ گه‌شتیار روویان له‌ ئا‌نتالیا كردووه‌، له‌وانه‌یش ٩٢ هه‌زار و ٨٨ كه‌سیان گه‌شتیاری ناوخۆیی بوون.

ئا‌نتالیا كه‌ ساڵی رابردوو نزیكه‌ی ١٤ ملیۆن گه‌شتیاری له‌خۆگرت چاوه‌ڕوان ده‌كرێت ئه‌مساڵ ١٦ ملیۆن گه‌شتیار له‌خۆ بگرێت و ژماره‌ی پێوانه‌یی تۆمار بكات.