لیبیا.. ساعدی کوڕی موعەمەر قەزافی ئازاد کرا

تەرابلوس - AA

ساعدی قەزافی کوڕی سەرۆکی پێشووی لیبیا، موعەمەر قەزافی لە زیندان ئازاد کرا.

بەگوێرەی لێدوانی چەند سەرچاوەیەکی ئەمنی لیبیا بۆ ئاژانسی ئانادۆڵو، ساعدی تەمەن ٤٨ ساڵ و ئەحمەد رەمەزان، سکرتێری پێشووی موعەمەر قەزافی لە شاری تەرابلوس ئازاد کراون.

سەرچاوەکان، باسیان لەوەش کردووە کە ساعدی قەزافی بە بڕیاری سەرۆکایەتی داواکاری گشتیی لیبیا و بە رەزامەندی سەرۆکوەزیران، عەبدولحەمید دیبەیبە ئازاد کراوە.

ئەوەش زاندراوە کە ساعدی بە فڕۆکە بەرەو تورکیا بەڕێکەوتووە.

ناوبراو لە سەردەمی دەسەڵاتی باوکیدا، بەرپرسی چالاکییە وەرزشییەکان بووە و لە هەمان کاتدا، یاریزانی هەڵبژاردەی تۆپی پێی لیبیا بووە.

ساعدی قەزافی دوای رووخانی رژێمەکەی موعەمەر قەزافی لە ساڵی ٢٠١١دا، بەرەو وڵاتی نیجەر هەڵات، بەڵام لە ساڵی ٢٠١٤دا و بە هەوڵی لایەنە بەرپرسەکانی لیبیا بەتۆمەتی "بەزۆر وەرگرتنی پارە لە کاتێکدا سەرۆکی ئەنجوومەنی تۆپی پێی لیبیا بووە" بڕیاری دەستگیرکردنی بۆ دەرکراوە و هێندرایەوە بۆ لیبیا.