Агенција Анадолу (АА) го сними домот во селото Кухестек, во округот Сирик, во иранската покраина Хормозган, каде што во американскиот напад на 1 септември загинаа пет лица.
По нападот домот што беше исполнет со свадбена атмосфера се претвори во место на жалост. На објектот се предизвикани големи оштетувања, а членовите на семејството се обидуваат да ги санираат последиците.
Екипата на АА го сними домот во кој за време на нападот загинаа пет лица, а 67 беа повредени. Во куќата, со површина од околу 500 квадратни метри, по нападот не може да се живее. Членовите на семејството, со помош на роднините, се обидуваат да ги изнесат предметите што останале неоштетени.
Од ударот на проектилот што навлегол низ таванот на една од собите, урнати се повеќе ѕидови во куќата, а сè уште се видливи и траги од пожарот што избувнал за време на нападот.
Во куќата, која сè уште има траги од пожарот, во моментов нема никој освен роднини на сопственикот што дојдоа во посета.
Според информациите, сопствениците на куќата, како и невестата и младоженецот, поради траумата што ја доживеале не сакаат да се вратат на местото на нападот и заминале во Бандар Абас, град оддалечен околу 200 километри од Сирик.
Шерифе Закириневаз, која ноќта на нападот била во свадбениот дом, но потоа отишла во соседната куќа бидејќи нејзиниот внук бил гладен, за АА раскажа што се случило.
„Седев во куќата каде што беше свадбата. Се слушаа звуци од експлозии од правец на морето. Реков: ‘Изгаснете ги светилките во куќата, за секој случај.’ Ми рекоа: ‘Луда ли си?’ Ми велeа: ‘Не паничи, не плаши се’, но јас многу се исплашив. Потоа внукот, кој сè уште беше во куќата, ми рече дека е гладен. Му кажав дека таму и онака ќе служат храна и дека треба да почека, но тој инсистираше, па заедно отидовме во соседната куќа да јадеме. Ја подготвив храната и токму кога седнавме на масата, се слушна неверојатно силна експлозија. Следуваа експлозија по експлозија, а јас реков: ‘Ја погодија куќата на Али.’ Почнав да викам: ‘Тоа беше куќата на Али, куќата на Али, куќата на свадбата!’ Потоа отидов таму и видов дека 67 лица се повредени и дека повредените лежат на земја. И мојата снаа беше повредена во пределот на тилот. Малите деца лежеа на земја. Сите викаа ‘марамче, вода’ за да им ги санираат раните. Веднаш однесов вода и марамчиња. Беше ужасен момент.“
Зборувајќи за загриженоста поради продолжувањето на американските напади, Закириневаз рече дека живеат во постојан страв.
„Во нападот беа скршени и сите прозорци на мојата куќа. Многу се плашиме, навечер од страв не може да спиеме. Мојот сопруг, детето и ќерката се многу исплашени. Живееме под голем стрес.“
Иран соопшти дека во нападот на американската војска врз куќа каде што се одржуваше свадба во селото Кухестек, Сирик, во покраината Хормозган, на 1 септември загинале пет лица, а 67 се повредени.
