Израелскиот аеродром „Бен Гурион“ затворен поради работен спор

Израелскиот аеродром „Бен Гурион“ прекина со работа во 14:00 часот по локално време (11:00 часот по Гринич) денес поради работен спор и веќе се затворени сите шалтери за пријавување на патниците, објавија израелските медиуми, пренесува Анадолу.

Израелската управа за аеродроми и властите за контрола на воздушниот сообраќај однапред ги информирале авиокомпаниите за претстојното затворање на аеродромот, објави израелскиот портал „Јнет“.

Одлуката е донесена откако на вработените им било наложено да ја прекинат работата на шалтерите за пријавување.

Наводно, со работа престанале и вработените во четири компании за услуги на земја што работат на аеродромот.

Прекините се случуваат во еден од најфреквентните периоди од годината, кога аеродромот опслужува приближно 100.000 патници и околу 600 летови дневно.

Според Израелската управа за аеродроми, одлуката за прекин на работата, во согласност со упатствата на работничкиот комитет, влијаела врз операциите на аеродромот и нарушени се услугите за патниците.

Управата за аеродроми ги повика вработените веднаш да го прекинат штрајкот со цел повторно да се воспостават операциите и услугите.

Доколку прекините продолжат, управата предупреди дека ќе побара интервенција од судските власти.

Претставници на израелското Министерство за транспорт предупредија дека вработените на аеродромот би можеле да бидат отпуштени доколку се утврди дека прекинот на работата е дел од намерно забавување на работниот процес, објави „Јнет“.

Министерката за транспорт Мири Регев му наложи на генералниот директор во Министерството, Моше Бен Закен, веднаш да се справи со ситуацијата, објави „Јнет“.