Мјанмар: Соборената лидерка Су Чи осудена на уште 4 години затвор

БАНГКОК

Соборената лидерка на Мјанмар, Аунг Сан Су Чи е осудена на 4 години затвор поради нелегално увезување и поседување на воки-токи, пренесува Агенција Анадолија (АА).

Објавена е втората пресуда од серијата различни обвинувања кон Су Чи, соборена со воен удар на 1 февруари 2021 година.

Судот во главниот град Непидо ја осуди 76-годишната Су Чи на четири години затвор, поради нелегално увезување и поседување воки-токи.

Претходно Су Чи на 6 декември беше осудена на 4 години затвор за поттикнување на јавноста на бунт и кршење на ограничувањата за Ковид-19, во првото од вкупно 11-те различни обвиненија против неа.

- Воен удар во Мјанмар

Армијата на Мјанмар ја презеде власта во земјата на 1 февруари и прогласи воена состојба во траење од една година. Притворени беа претседателот Вин Минт, челничката на земјата, Су Чу, како и останатите водечки членови на владејачката партија Национална лига за демократија (НЛД).

Како резултат на вооружената интервенција на Армијата на Мјанмар врз демонстрантите против пучот, досега 902 цивили го загубија животот, а илјадници се приведени.

Во меѓувреме, според Организацијата за помош на политички затвореници (AAPP), во текот на пучот животот го загубиле 1.200 луѓе, а приведени се околу 10 илјади.

Додека се одржуваат демонстрациите што започнаа на 6 февруари со барање за враќање на демократијата во земјата, продолжува судењето на приведените високи државни функционери пред Воениот суд.