Ердоган ја предупреди Грција: „Ако отидете предалеку, цената ќе биде висока“

САМСУН (АА) - Во услови на напнатост меѓу Туркије и Грција, турскиот претседател Реџеп Таип Ердоган денес ја повика Атина да погледне во историјата, порачувајќи: „Ако отидете предалеку, цената ќе биде висока“, јавува Агенција Анадолија (АА).

„Грција, погледни ја историјата, врати се во времето; ако отидеш предалеку, цената ќе биде висока. Имаме една работа да ѝ кажеме на Грција: Не заборавај го Измир“, рече Ердоган на најголемиот технолошки настан во Туркије, Текнофест, во турската област Самсун на брегот на Црното Море.

Измир е област на турскиот западен брег на Егејското Море, која Анкара ја ослободи од грчка окупација во 1922 година, како дел од нејзината Војна за независност.

Ердоган ја предупреди Грција велејќи дека „окупацијата“ на островите во Егејското Море од страна на Атина „не е наша грижа“.

„Кога ќе дојде време, ќе го направиме она што е потребно... Одеднаш, можеме да дојдеме преку ноќ.“

Тензиите меѓу двете соседни земји се зголемија откако Грција поднесе жалба до генералниот секретар на НАТО, Јенс Столтенберг, за бришење на твитот на Командата на копнените сојузнички сили на НАТО (ЛАНДКОМ) по повод одбележувањето на 100-годишнината од Денот на победата на Туркије, со кој се одбележува убедливиот пораз над окупаторската грчка војска од страна на Турците во Битката кај Думлупинар во 1922 година.

ЛАНДКОМ во вторникот објави твит по повод 100-годишнината од Денот на победата. Сепак, во четвртокот објави нов твит во кој ѝ честита на Анкара, велејќи: „Благодарни сме што ја имаме Туркије како земја домаќин.“

Туркије упати критики кон НАТО за бришењето на твитот, оценувајќи го потегот за неприфатлив, и потенцирајќи дека Алијансата „во голема мера го наруши корпоративниот идентитет и престижот на НАТО“ со бришење на твитот по неоснованото барање на Грција.