Aliia Raimbekova
03 Korrik 2023•Përditësim: 04 Korrik 2023
Zëvendësministrja e Mbrojtjes e Ukrainës, Anna Malyar, njoftoi se zonat e çliruara në lindje u rritën me 9 kilometra katrorë dhe 28,4 kilometra katrorë në jug gjatë javës së fundit, transmeton Anadolu.
Në deklaratën e saj në rrjetet sociale, Malyar vlerësoi zhvillimet në frontin lindor dhe jugor gjatë javës së fundit.
Duke thënë se ushtria ukrainase vazhdon veprimet sulmuese dhe mbrojtëse në lindje, Malyar tha: "Ne po përparojmë në drejtim të Bakhmutit. Armiku vazhdon të sulmojë në drejtimet e Lyman, Avdiyivka dhe Marinka".
Malyar tha se rusët u përpoqën të dëbonin trupat ukrainase nga pozicionet e tyre në këto drejtime, por ata u sulmuan nga forcat ukrainase.
Duke theksuar se përleshjet e ashpra në këto drejtime vazhdojnë, Malyar tha se "si rezultat i përmirësimit të situatës operacionale në javën e fundit, zona e çliruar është rritur me 9 kilometra katrorë".
Ajo tha se forcat ruse kanë dyfishuar sulmet e tyre në lindje gjatë javës së fundit. Malyar deklaroi se javën e kaluar janë regjistruar 6.457 sulme dhe kjo shifër u rrit në 11.753.
Duke theksuar se forcat e mbrojtjes ukrainase në jug vazhdojnë operacionet e tyre sulmuese në drejtimet e Melitopol dhe Berdyansk, Malyar tha se javën e fundit zonat e çliruara në frontin jugor u rritën me 28,4 kilometra katrorë.
