Rewa Mahmood Hasan
10 کانوونی یەکەم 2020•نوێکردنەوە: 11 کانوونی یەکەم 2020
سلێمانی-AA
لە خۆپیشاندانە بێمۆڵهتهکەی ئێوارهی ئەمرۆی شارۆچكهی کفریدا، گەنجێک کوژرا و یەکێکی دیكهش بەسەختی برینداربوو.
سەرەڕای هۆشداریی لیژنەی باڵای ئەمنیی بهوهی كه رێگه به خۆپیشاندانی بێمۆڵهت نادرێت، بهڵام کۆمەڵێک كهس بە بیانووی پێنهدانی مووچهكانیان و زیادبوونی بێکاریی لە شارۆچكهی کفری سەربە ئیدارەی گەرمیان دهستیان به ناڕهزایهتیی كرد و دواتر لەنزیک بارەگای ناوچەی پارتی دیموكراتی كوردستان لە شارەکە گردبوونهوه.
بەپێی سەرچاوەیەک لەنێو خۆپیشاندانەکەوە، هێزە ئەمنییەکان به مهبهستی بڵاوهپێكردنی خۆپیشاندهران و رێگرییكردن لە هەڵکوتانە سەر ههر بارەگایەک تەقەیان بە ئاسماندا کردووە، و ئهمهش گرژیی و ئاڵۆزیی لێکەوتووتهوه.
لهبارهی بوونی بریندار یان كوژراو له ئهنجامی خۆپیشاندانهكان، بەڕێوەبەری تەندروستیی گەرمیان، سیروان جەمال به پەیامنێری ئاژانسی ئانادۆڵوی رایگەیاند: "ئەمرۆ دوو کەس هێنراونهته نەخۆشخانەی فریاکەوتن لە کەلار، یەکێکیان گیانی لەدەستدابوو، ئەوی دیكهیان بەسەختی بریندارببوو".
سیروان جەمال راشیگهیاند: "ئەو کەسەی لە خۆپیشاندانەکەی ئەم ئێوارەیەی کفریدا گیانی لەدەستدا فیشەک بەر سەری کەوتووە و بریندارەکەش شوێنهواری سێ فیشەکی پێوەبووە، بەهۆی سەختی برینەکەیەوە رەوانەی نەخۆشخانەی شار کراوە لە سلێمانی".
بەپێی زانیارییەکانی پەیامنێری ئاژانسی ئانادۆڵو گەنجە کوژراوەکەی کفری لەدایكبووی ساڵی ١٩٩٩یە و ناوی شڤان مەحمود شوکر-ە، بریندارەکەش لەدایكبووی ساڵی ١٩٩٨ە و ناوی سەڵاح عەزیز محەمەد-ە.
ماوەی نۆ رۆژە خۆپیشاندان لە ١٥ شار و شارۆچکەی سەر بە پارێزگاکانی هەڵەبجە، سلێمانی و ئیدارەکانی گەرمیان و راپەرین دەستیپێکردووە، پێنج رۆژیشه خۆپیشاندانهكان گرژیی و ئاڵۆزییان بهخۆوه بینیوه و قوربانییان لێكهوتووهتهوه. بەپێی زانیارییە پشتڕاستکراوەکان تائێستا ١٠ کەس گیانیان لەدەستداوه، کە دووانیان سەربە هێزە ئەمنییەکانی هەرێمی کوردستانن و ٥٤ برینداریش لە نەخۆشخانەکانی سلێمانی تۆمارکراون.
