Талат Џафери оствари средба со Столтенберг

СКОПЈЕ (АА) - Претседателот на Собранието на Република Македонија, Талат Џафери, денеска оствари средба со генералниот секретар на НАТО, Јенс Столтенебрг, кој престојува во официјална посета на Република Македонија, јавува Anadolu Agency (AA).

Од собраниската прес-служба соопштија дека Џафери изразил убеденост оти само со конструктивен дијалог со соседите во однос на спорните прашања и со активен ангажман на институциите и на сите политички субјекти во исполнувањето на Планот 3-6-9, ќе се финализира „незавршената работа“ од Букурешкиот самит на НАТО во 2008 година.

Столтенберг ја потенцирал понатамошната поддршка на НАТО за исполнувањето на амбициозната реформска агенда на новата Влада, особено на планот за владеење на правото, јакнењето на мултиетничкото општество и принципите на Охридскиот договор, како и за одржувањето и негувањето на добрососедските односи.

„Како позитивен исчекор во оваа насока е ратификацијата на Договорот за добрососедство со Република Бугарија, со што се отвора ново и квалитетно поглавје во регионален контекст. НАТО, со големо внимание го следи прогресот во функционирањето на Собранието на Република Македонија, особено по немилите настани од 27 април минатата година, бидејќи верува дека Собранието е платформата за заедничка работа на власта и опозицијата, низ реален политички дијалог, конструктивно да работат за бенефит на сите граѓани“, истакнал Столтенберг.

Tој нагласил дека НАТО особено го вреднува реалниот придонес на Република Македонија во мировните мисии на НАТО, каде државата се цени како мошне квалитетен и почитуван партнер.

„Столтенберг подвлече дека НАТО и понатаму ја охрабрува Република Македонија да продолжи во надминувањето на основната пречка која е предуслов за полноправно членство на Македонија во НАТО Алијансата. Поддршката дадена на Букурешкиот самит на НАТО и повторена на следните два самита, сè уште останува и е во насока на што побрзо зачленување на Република Македонија како 30. земја-членка на НАТО“, соопшти Собранието.